يالصاحب المطنوخ اسمع كلامي زين
انا خويك اللي ليامالت يعدلها
قلي وش المطلوب ياأبن الكريمين
قلي وش الصعبات وانا جملها
ازهم على صاحيين نحضر مجانين
اما كذا والا الرخامه لآهلها
لاضاق صدرك لاتخاوي مساكين
خلك مع اللي نيته مايبدلها
ـــــــــــــــــــــــ
مانيب في طرد المقفين ملزوم
مالي بهم ياطيب الفال حاجه
المسك مسك وبينه ريحة الثوم
والورد عطره ماتحبسه قزازه
المال عمره مابنى المجد للرخوم
والنذل مايقضي للأجواد حاجه
ــــــــــــــــــــــــ
هني من عشار من الناس شرواك
في ذمتي يعيش والراس مرفوع
تبقي عزيز وتعجبني مزاياك
يالي بيمناك اجزل الطيب مطبوع
عسى البلاوي والمصايب تعداك
تصيب ناس عنهم الطيب مقطوع
ـــــــــــــــــــــــ
والله ماني على مدح الرّياجيل بخيل
خاصةً لا جيت أمدح في زحول الرّجال
المشكلة مدحهم حمل لا شلته ثقيل
من ثقلها ما يقدر عليها كبار الجمال
حتّى لو تحاملت على حملها لا بدّ يميل
مال الجمل حيله على حمل الأثقال
أجل وش حيلة قلم بالقصايد يخيل
في معانيها صدق من مزون الخيال
قصيدة ما هي غزل فالطرف الكحيل
ولا هي عتاب وشكوة حال دون حال
قصيدة مدح في ذاك الشهم الأصيل
ـــــــــــــــــــــــ
انـا عـزاك وعزوتـك لا جرالـك
من تاعس الدنيا هواجيس واهـوال
ماني من اللي لاغتنـى مـا وفالـك
لو لك عليه من الجمايـل والأفضـال
وماني صديقك كان وقتـك صفالـك
أنا صديقك لأدبـرت فيـك الاحـوال
خذني عصى موسى إذا كنـت هالـك
لمسحلك بحور القهر قـول وافعـال
فالك عسى الله يسعـد اليـوم فالـك
فالك عقب صوم الدهر عيـد شـوال
وبالك يجي في خاطرك يـوم بالـك
انـك تغيـب ولاتجيلـي عـل بـال
لا لا تفكر انـت فـي مثـل ذلـك
إني اتخلى عنك لـو الزمـن طـال
ما اقول انـا ياعـم مالـي ومالـك
ماترخص العشره ولا تغني امـوال
اسمع جوابي قبل ما اسمع سؤالـك
خارج حدود التغطيه وارسل ارسـال
على محيـط السالفـه حـط دالـك
أجيك رجلي كان مـا جيـت خيـال!
انا لياشـح الزمـن فـي وصالـك
تمدني النخوه علـى وصلـك حبـال
انا عمـى عيـن العـدو لا نوالـك
انول روحه قبل مـا روحـك تنـال
بينك وبين الشمس شجـرة ضلالـك
ماللشجـر قيمـه إذا مالـه ضـلال
والليـل لـو الليـل مظلـم وحالـك
ترسمني الظلمى على صـدره هـلال
ماني ولد عمـك ولا اغلـى عيالـك
خطوى الخوي يسوى بني عم وعيال
مايعرف الخوه ياكود الاصاحيب
الي يحفضون الصداقه امانه
شرواكم هم اهل الوفاء والمواجيب
والا الردي دايم طويل لسانه
ومن لا يعرف العيب ماهمه العيب
حتى لون العيب يلحق اخوانه
وعود البخور ليحترق ريحته طيب
وطيب الرجل بالمرجله والشهامه
وبعض العرب زلات هرجه عذاريب
وبعض العرب زلات هرجه ميانه
ـــــــــــــــــــــــــ
نزعل ونتكبّــر وحنا من الطيـــن .
والكل منا صــــدّ لا أقبل خويّــه
نفخر نقول إنا على الصد قاوين
وهــــيّ علينا في الحقيقـــــة قــــويه
نشفق على الطيبة و كسب الكريمين
وهذي بنا لاشك فعــــلةرديـــــــــه
ننسى نهايتنا وعلى وين ماشيــــن
وننسى الزمان اللي جمعنا ســـــــويه
المشكلة ماهي بـ حاجة لــ تخمين
ولاهي بعد ياناس صعبـــــة القضيـــه
دق الرقم : كيفك هلا فيك وأهليــن
أنــا الخـــوي اللـي مـــــزعّــل خويــــه
قلّه : تغيب وصـــورتك داخل العين
ويبقــى لـ حبك في خفـــوقي بقيـه
أخوان حنا لو يجي بيننا شيــن
و مانفتـرق دام المحبـة نديـه
خلك قــوي لاتحتــــكرك الشياطين
قبل الفوات وقبل وقت المنيـــه
كلّم خويــك بـــ اطيب الهرج واللين
وأعرف جميل الهرج يمســــح رديــه
هذي هي الدنيا من الحين لـ الحين
لابد بين الناس تحصــــــل خطيـه
ومن لايقدّر غلطــــة أحبابه الحيــن
يقـــــرأ حـــــروفي ويعتبرها هــديه
باكر تمر سنين وسنين ... وسنيـــــن
والــكل يرحـل في الدروب المــديـه
صدقني تندم وأذكر حروفنا زين
تندم على خلك إذا غاب ضيّــه
دنيا غريبــــة وأكثر الناس ماشين
وكم صــــاحبٍ والله دفنته بــ يديـه
ــــــــــــــــــــــــــ
طبع الصديق الكفو يعـذر صديقـه
ولا شاف زلّة صاحبه يرتفع فـوق
وان عادها يبحث عن أسلم طريقـة
ويخبره باللي صار بإحساس وبذوق
والثالثـة الله يسـمّـح طــريـقـه
مااحدٍ بمجبورٍعلى خـوّةالبـوق
فبعض العــرب صحبته همٍ وضيقـة
لا فعلٍ يجمّـل ولا زيـن منطـوق
لما اعتزيت بخــــوّتـه نشـف ريقـه
وابشر بضحكة ناب وبهرج منموق
يحلف لك انك مثل خـوه وشقيقـه
وقلبه بنار الحقد والغـل محـروق
أدري المعانـي كلبوهـا عتيـقـة
وشعر الصداقة فيه ألفين طـاروق
لكن مشاعـر والمشاعـر رقيقـة
ولا اخفيتها ردّت لي الطاق مطبوق
وزادت على قلبي جـروحٍ عميقـة
ولما دفنت الجرح يطلع له عـروق
وأعمى البصيرة ما يشوف الحقيقـة
لا صار قلبه عن سنا الحق مصفوق
تلقاه يسأل عـن عصـاه وبريقـه
وهي في يده والقلب جا للبصر عوق
يطرد سرابٍ يخدعـه فـي بريقـه
ويقعد يغني ( كل مطرود ملحـوق )
وبعد التروّي قلت با اكتـب وثيقـة
تضبط علاقاتي مـع كـل مخلـوق
وما عاد أصاحب بالطبع والسليقـة
أصبح عليّ حقوق وأصبح لي حقوق
باختار لـي كفـو يمينـه طليقـة
وقلبه لسرّي ولخفايـاي صنـدوق
نفسه لهامـات المعالـي عشيقـة
ولا شاف مني زلّـة يرتفـع فـوق
صحّ البشر مــن آدم أبـو الخليقـة
لكن لكل إنسـان ميـزات وفـروق
وصلاة ربـي كــــل وقـت ودقيقـة
على النبي وعداد ما لاحت بـروق
ــــــــــــــــــــــــــ
الطيب فرصه والجمايل توافيق
ومن لاتوفق ماكتب له جماله
ومن لارقا للطيب روس المشاهيق
مازان له وقته على ماطراله
ومادام لفعول الجمايل عشاشيق
كسب الجمايل مايجي بالسهاله
ولو أنها تشرب على فكة الريق
كل(ن) خذاله كل ماأصبح بياله
والطيب منوة للقلوب المشافيق
كل(ن)يتوفق ومنوته رأس ماله
والمدح مايزهي على الرجل ويليق
الا ليا صارت وآفيات خصاله
يستاهله رجل(ن) يفك المزانيق
اللي يقال ونعم لاجا مجاله
ومن ساقته نفسه وهو مابعد سيق
لآجل الجمايل سهل الله مجاله
والمرجله ماهيب تحتاج تنسيق
ومن بين قلب اللي عشقه رجاله
ومن عادة الدنيا تخون المواثيق
تفتر مكراتها سوات المحاله
ولولا اللوازم ماعرفنا المخاليق
وما نعرف الرجال لين ننعناله
والكفو تظهر فزعته حزة الضيق
وينشاف في الشدة بعين العواله
نسل الرجال متعبين الملاحيق
متوسط(ن) ما بين عمه وخاله
واللي يطيق ولاجات قال ماطيق
نمو عليه المرجله والشكاله
والهينه تكبر على اللاش وتضيق
له في الرخا قاله وفي الضيق قاله
والطيب شارة والضماير صناديق
واللاش طيبه ما تعدى ظلاله
ومادام في الدنيا رجال ومطاليق
نصيتهم واللاش مالي وماله
ـــــــــــــــــــــــ
أنا الصديق اللـي لياطحـت شالـك
لضامتك دنياك والوقت بـك مـال
أنـا يمينـك شدنـي فـي شمـالـك
يمنى بلا يسرى ترى حالهـا حـال
انـا عـزاك وعزوتـك لا جرالـك
من تاعس الدنيا هواجيس واهـوال
ماني من اللي لاغتنـى مـا وفالـك
لو لك عليه من الجمايل والأفضـال
ــــــــــــــــــــــــ
اخوك لا تخســـره لو انه عنـــيد
يخطي مية مرة وتسمح له خطاه
وان كان شد الحبل حاول ما تزيد
ارخيه قبل الشـد يوصـل منتهاه
ولا تنصحه وقت الزعل ما يستفيد
واعرض عليه النصح في ساعة رضاه
وليا طلب رايك عطه رايً سديد
وان ماطلبك الراي لا تبحث خفاه
واعرف ترى قرب المنازل ما يفيد
واحيان يبــدي شي ما ودك تراه
بـــس لا تقرب ولا تنزل بعـــيد
خلك على قول المثل حذفة عصاه
واحفظ حبال الود حفظك للوريد
اللي معلق فيه موتك والحياه
ترى الاخو مهما حصل يبقى عضيد
وترى عيال العم ما عنهم غناه
الناس دايم ما تهاب اللي وحيد
اللي ليا منه وقف مـحداً معآه.
ــــــــــــــــــــــــــــ
الصاحب اللي يرفع الراس نشريه
نوفــــي لــه الميزان ونكرم جنابه
ونزيد في حقه وناخذ ونعـطــيــه
ولانسمــع النمام مهما حـــكى به
ـــــــــــــــــــــــــــ
يا الصاحب اللي لنا من شوفتك مده
مدري تغيرت ولا خوف من عندك
الله لا عاد يومن راح بك جده
قمته تكبر ولا عاد احدن قدك
ــــــــــــــــــــــــــ
الصاحب الي قطع عني مواصيله
انساه وتذكره لاناحت الورقا
وحط كفي على قلبي وغنيله
يامل قلبن يلوعه طاري الفرقا”
ــــــــــــــــــــــــــ
صدور . الاصحاب للأصحاب منشرحہ*
*شرهاتها ما تغث صدورها الرحبہ*
*اللي ياقف معک عند الحزن والفرحہ
*هذا هو الصاحب وهذي هي . الصحبہ
ــــــــــــــــــــــــ
الصاحب اللي تجي من يمه الزلة
آصد عنها *ولِد *لْعلمه الراقي
أحيان من طيبها لى فاحت الدلة
تنثر بعضها ونشرب بعْضها الباقي
ــــــــــــــــــــــ
يشتاق قلبي دايما للمطاليق
شوق الحبيب اللي تمنى حبيبه
كنز الرجال ولا كنوز الصناديق
المال يفنى والنشاما تجيبه
رعاك ربي من عيون المخاليق
والله يصيب اللي يبي لك مصيبه
ــــــــــــــــــــــ
فيني شموخ غارسه شايبي غرس
ومهما يجور الوقت مالن راسي
ابوي علمني وانا حافظ الدرس
ماأخـــــالف سلم جدي وساسي
انا حمست العز في داخلي حمس
وهيلت فنجـــانه وقندت راسي
ــــــــــــــــــــــ
لا تلحق الطيّب مشاريه لا غاب
يمكن ظـروفه عن وصـالك حدنه
اغلق وجيه اللوم لا تفتح عتاب
حذراك .. شرهـاتك ولومك يجنه
***
اليا زعل من مدح رجال رجال
ما يستشك الا عديم الرجوله
يوزن فعوله في موازين الافعال
حتى يحدد من فعوله فعوله
***
مدح النشاما واجب دون مصلوح
ولا الردي مامدحه لو هو بنا خي
نمدح رجال بالفخر تبني صروح
ربع على كبد الردي تنجح الكي
***
كثر الهروج الفاضية والهرابيد
ينقص بها الرجال وتحط قدره
من كان يبغى مدح كل الاجاويد
يطق لافعال الرياجيل صدره
***
ادري انك ماتبي شكر وزيادة رصيد
ولاتبي مدح وتبجيل وزيادة كلام
بس عندي كلمتين ولاودي أزيد
انك من اشرف رجال من فعل ومقام
***
سلام ياشاعر جزل الطواريق
يابن طلق راع الوفاء والشهامه
عندي على مدح النشامى مواثيق
رجال الوفاء والعز ساس الزعامه
***
مدح الرجال يعطي الشاعر وسام
يطلق لساني مدحهم وجه وجاه
خويهم بفرح ويسعد مايلام
دونه رجال درع جمبه وتحماه
***
انا ليا مني بغيت امدح الناس
ما مدح قليل العرف ولا الهلامه
امدح رجال فعلهم يرفع الراس
ربعي هل الحرشا وراس الزعامه
ماهو غريب الطيب ياطيب الساس
في اهل الوفا والعز واهل الشهامة
***
احفظ رفيقك واستره لاتخونه
وان سولفو به لاتجامل وتحتار
لا تصير اول من يخيب ظنونه
وقف لعينه عندهم وقفت رجال
الكفو كفو وخوته ترفع الراس
ومثلك فخر إني اناديه ي الخوي
وطبع المراجل فيك ماتقرب العيب
لا هان من رباك شيخن على ساس
ـــــــ
معتدل رغم الزمان الملتوي
وأحمد الله من صمود في صمود
جعلني ما طيح من عين الخوي
وجعلني ماطيح في عين الحسود
_______
عز الخوي لاصار همک طوابير
وقت الشدايد واضحن لک مكانه
يعطيگ روحـه مايهاب المخاسير
قليل منهو يشبهه في زمانه
______
الرفقه اللي ماتجي ساعة الضيق
وقت الرخا عنها تراني غناوي
اما تجي على السنع والمواثيق
ولا على ماقيل ..رفقة هقاوي